Як паведаміла радыё "Голас Манголіі”, нарада парламенцкай групы Мангольскай народна-рэвалюцыйнай партыі (МНРП) надоечы разгледзіла і адобрыла законапраект аб гендэрнай роўнасці.
Падчас ягонага абмеркавання галава фракцыі Данзангійн Лундээжанцан адзначыў, што закон прадугледжвае вялікі працэнт удзелу жанчын сярод кандыдатур падчас выбарчай кампаніі – 30%. "Аднак парламентам гэты законапраект яшчэ не прыняты, таму трэба пакінуць згаданую тэму адкрытай”, – заўважылі члены фракцыі. Яны выказалі меркаванне, што было б правільным, каб падчас рэалізацыі новага закону выкарыстоўвалася больш гнуткая форма квот.
Паводле законапраекта, усе дзяржаўныя ўстановы павінны мець пэўную долю жанчын, якая забяспечыць роўнасць. Напрыклад, з кіраўнікоў 21 аймака (правінцыі) восем мусяць прадстаўляць жаночы пол.
Доўгія дзесяцігоддзі МНРП была кіруючай партыяй у сацыялістычнай Манголіі. У 1990 годзе яна адмовілася ад марксісцка-ленінскай дактрыны.
МНРП валодае большасцю (60%) у тутэйшым парламенце – Вялікім дзяржаўным хурале. Ён з’яўляецца аднапалатным органам і складаецца з 76 дэпутатаў. Цяпер у парламенце працуюць тры жанчыны.