29 снежня споўнілася 25 гадоў з моманту заснавання Дома адзінокай маці ў Тарнаве (Малапольскае ваяводства, Польшча). З гэтай нагоды быў арганізаваны дзень адчыненых дзвярэй. Прытулак наведалі былыя падапечныя, ахвяравальнікі ды сем’і, якія ўсынаўляюць дзяцей, што з’явіліся на свет у гэтым будынку.
Дом адзінокай маці паўстаў дзякуючы біскупу Ежы Аблевічу. Ён набыў гэты будынак, каб дапамагчы жанчынам, якія апынуліся ў складанай сітуацыі. Сюды трапляюць з дрэнных сем’яў, напрыклад, замужнія, якіх б’е сужонак. Усё часцей прыходзяць бяздомныя. Зараз у Доме адзінокай маці знаходзяцца чатыры жанчыны і восем дзяцей. За 25 гадоў у прытулку нарадзіліся 379 малых.
Манашка Малгажата Барчыньска, кіраўнічка дому, паведаміла Польскаму радыё для замежжа: “Нашая дапамога заключаецца ў тым, што мы імкнемся навучыць жанчын быць адказнымі за сваю сям’ю і дзяцей, а таксама, каб яны ўмелі браць адказнасць за ўласныя ўчынкі і ўмелі дапамагаць адна адной”.
Каталіцкая царква фінансава падтрымлівае дзейнасць прытулку. Дапамагаюць таксама іншыя спонсары, ахвяроўваючы грошы, сродкі гігіены і рэчы, патрэбныя жанчынам і дзецям.