Крок да роўнасці | Krok ku równości | Шаг к равенству

Рух недалучэння цікавіць паляпшэнне становішча жанчын

viator — Fri, 24 Feb 2012 05:57:04 GMT

Беларусь прыняла ўдзел у міністэрскай сустрэчы Руху недалучэння па паляпшэнні становішча жанчын, якая праходзіла ў сталіцы Катару – горадзе Доха.
Нашу дэлегацыю ўзначальваў амбасадар у Аб’яднаных Арабскіх Эміратах Аляксандр Сямешка. Падчас выступлення на форуме ён зрабіў акцэнт на намаганні Беларусі па дасягненні гендарнай роўнасці і забеспячэнні правоў жанчын. Адзначаны ініцыятывы беларускага боку па фарміраванні глабальнага партнёрства супраць рабства і гандлю людзьмі ў XXI стагоддзі. Па выніках міністэрскай сустрэчы прынята Дэкларацыя Дохі і праграма дзеянняў, якія прадугледжваюць захады па ўмацаванні становішча жанчын у сучасным свеце.

Юрый Сцяпанаў паводле матэрыялаў www.radiobelarus.tvr.by/bel/

На Тайвані сыны часцей, чым дочкі атрымліваюць у спадчыну маёмасць бацькоў

viator — Fri, 24 Feb 2012 05:55:31 GMT

Міністэрства фінансаў Кітайскай Рэспублікі агучыла даклад, паводле якога тайваньцы часцей адпісваюць сваю маёмасць сынам, чым дочкам.
Нягледзячы на рост сацыяльнага статуса жанчын і іх эканамічную незалежнасць, старэйшае пакаленне па-ранейшаму прытрымліваецца традыцыйных поглядаў і аддае перавагу мужчынам.
Паводле даследавання, гендэрная няроўнасць на Тайвані больш за ўсё праяўляецца ў пытаннях завяшчання і атрымання ў спадчыну маёмасці.

Шмат якія бацькі дораць нерухомасць дочкам у якасці пасагу, а астатнюю маёмасць пакідаюць сынам, распавёў юрыст, які дапамагаў многім багатым кліентам размяркоўваць маёмасць паміж дзецьмі. У выніку многія дочкі вымушаны адмаўляцца ад спадчыны.
У 2009 фінансавым годзе 65% людзей, якія адмовіліся ад спадчыны, належалі да жаночага полу. Атрымліваецца, што 60% спадчынніц вымушаныя адмаўляцца ад свайго права на маёмасць, зрабіла выснову Міністэрства фінансаў.
Гендэрная няроўнасць выяўляецца таксама ў падарунках, якія бацькі дораць дзецям перад смерцю. У 2010 годзе мужчыны склалі 60% ад агульнага ліку атрымальнікаў падарункаў.
Па тайваньскаму заканадаўству, у выпадку смерці члена сям’і і адсутнасці завяшчання, першымі прэтэндэнтамі на атрыманне ў спадчыну яго маёмасці з’яўляюцца супружнік (супружніца) і дзеці.

Юрый Сцяпанаў паводле матэрыялаў www.rti.org.tw

У РК павысіўся індэкс гендэрнай роўнасці ў сферы занятасці

viator — Fri, 24 Feb 2012 05:53:48 GMT

У 2010 годзе індэкс гендэрнай роўнасці ў сферы занятасці ў Паўднёвай Карэі склаў 58,7 пункта, што на 1,8 пункта вышэй, чым у 2009 годзе. Пра гэта паведаміла Міністэрства працы і занятасці РК. Дадзены індэкс паказвае ступень гендэрнай роўнасці на рынку працаўладкавання. Пры яго падліку ўлічваецца каэфіцыент працаўладкавання сярод мужчын і жанчын, узровень пастаяннай занятасці, суадносіны пагадзіннай аплаты, узровень занятасці ў адміністрацыйным сектары. Міністэрства паведаміла, што сітуацыя з гендэрнай роўнасцю ў сферы занятасці палепшылася па ўсіх чатырох крытэрыях. Асабліва вылучаюцца паляпшэння паказчыка пастаяннай занятасці. У 2010 годзе ён складаў сярод мужчын 69,6 пункта, а сярод жанчын – 49 пунктаў, што на 3,6 пункта вышэй, чым пазалетась.

Юрый Сцяпанаў паводле матэрыялаў www.world.kbs.co.kr

Расіянін вербаваў беларусак для прастытуцыі

viator — Fri, 24 Feb 2012 05:51:21 GMT

Яго затрымалі ў канцы студзеня ў Віцебск пры спробе вывезці ў Маскоўскую вобласць дзвюх жыхарак абласнога цэнтра.
МУС Беларусі спыніла дзейнасць грамадзяніна Расіі, які пры дапамозе інтэрнэту вербаваў жыхарак Віцебскай вобласьці для прастытуцыі ў Маскве й Падмаскоўі. Пра гэта паведамілі ва УУС Віцебскага аблвыканкама.
31-гадовы "вярбоўшчык” звязваўся з дзяўчатамі праз Інтэрнет і адкрыта прапаноўваў уладкаванне на працу ў сферы аказання інтымных паслуг. Пры гэтым маляўніча апісваў умовы працы і абяцаў казачна высокія заробкі, гарантуючы меры бяспекі ад сутэнёраў.
Яго затрымалі ў канцы студзеня на станцыі Віцебск пры спробе вывезці ў Маскоўскую вобласць дзвюх жыхарак абласнога цэнтра. Яму пагражае пазбаўленне волі ад 7 да 10 гадоў з канфіскацыяй маёмасці.

Юрый Сцяпанаў паводле матэрыялаў www.radyjo.net

У польскай сталіцы запрацавала фотовыстава пра беларускіх жанчын

viator — Sat, 28 Jan 2012 05:35:47 GMT

У Варшаве адбылася прэзентацыя фотаальбома "Беларускі. Жанчыны Еўропы” менскай фотамастачкі Алены Адамчык. Мерапрыемства прайшло ў Культурным цэнтры Беларусі.
У імпрэзе ўдзельнічалі дыпламаты, акрэдытаваныя ў польскай сталіцы, прадстаўнікі грамадскасці, а таксама адна з гераінь фотаальбома – алімпійская чэмпіёнка па мастацкай гімнастыцы Марына Лобач.

Юрый Сцяпанаў паводле матэрыялаў www.radiobelarus.tvr.by/bel/ і www.radyjo.net

Гаіцянскія дзеці – аб’екты гандлю і сексуальнага гвалту

viator — Thu, 21 Jul 2011 04:34:47 GMT

Намесніца Вярхоўнага камісара ААН па правах чалавека Гюн Ва Кан заклікала да ўмацавання сістэмы абароны гаіцянскіх дзяцей. Непаўналетніх прадаюць. Юныя гаіцянкі падвяргаюцца сексуальнаму гвалту.
Супрацоўніца ААН паведаміла, што гандаль дзецьмі на мяжы з Дамініканскай рэспублікай адбываецца цалкам беспакарана. Гюн Ва Кан адзначыла, што неабходна тэрмінова вылучыць больш рэсурсаў для ўстаноў па абароне непаўналетніх і ўмацаваць прававую базу па расследаванні інцыдэнтаў і прыцягненню вінаватых да адказнасці.
Па дадзеных Міжнароднай арганізацыі па міграцыі, каля 400 гаіцянскіх дзяцей, якія пражываюць у намётавых лагерах пасля леташняга землятрусу, падвергліся сексуальнаму гвалту. Амаль 97% ад агульнага ліку згвалтаваных дзяцей складаюць дзяўчынкі.

Юрый Сцяпанаў паводле матэрыялаў ruso.prensa-latina.cu

Акадэмія МУС дыскрымінуе жаночы пол

viator — Thu, 21 Jul 2011 04:31:31 GMT

Акадэмія Міністэрства ўнутраных спраў Беларусі выдзяліла толькі 5% месцаў для дзяўчат, пры гэтым толькі на следча-экспертным факультэце. Паведаміў аб гэтым кіраўнік згаданай ВНУ Уладзімір Бачыла.
Усяго на факультэце будзе вучыцца 135 чалавек. Летась для дзяўчат было выдзелена каля 10% усіх месцаў у Акадэміі МУС.
Начальнік Акадэміі МУС растлумачыў, што набор дзяўчат скарочаны ў сувязі са складанасцю прафесіі і навучання ў акадэміі. Паводле яго слоў, супрацоўнік МУС павінен валодаць пэўнымі псіхалагічнымі асаблівасцямі і маральнымі якасцямі, мець сур’ёзную фізічную падрыхтоўку, быць вынослівым і адпавядаць патрабаванням, што прад’яўляюцца да яго. Акрамя таго, "ніхто не будзе чакаць тры гады, пакуль жанчына выйдзе з дэкрэтнага адпачынку”, – зазначыў Бачыла.

Юрый Сцяпанаў паводле матэрыялаў www.radyjo.net

Ля стырна МВФ упершыню стала жанчына

viator — Thu, 21 Jul 2011 04:30:01 GMT

Міжнародны валютны фонд заявіў, што міністарка эканомікі, фінансаў і прамысловасці Францыі Крысцін Лагард абрана дырэктаркай-распарадчыцай МВФ.
Тэрмін паўнамоцтваў новай кіраўнічкі – пяць гадоў. Гадавая зарплата складзе 467940 долараў ЗША.
Крысцін Лагард з’яўляецца 11 старшынём МВФ. Яна стала першай жанчынай, абранай на пасаду дырэктара-распарадчыка гэтай фінансавай арганізацыі. Міжнародны валютны фонд існуе з 1944 года. У яго ўваходзяць 187 краін, у тым ліку Беларусь.

Юрый Сцяпанаў паводле матэрыялаў belarusian.cri.cn

Жанчыны складаюць толькі 10% сярод кіраўнікоў дзяржаў

viator — Thu, 21 Jul 2011 04:27:05 GMT

Удзел жанчын у жыцці дзяржавы – неабходная ўмова поспеху дэмакратыі і росквіту грамадства. Аб гэтым кіраўнік Арганізацыі Аб’яднаных Нацый Пан Гі Мун нагадаў у пасланні да ўдзельнікаў форуму ў Вільні, прысвечанага ролі жанчын у пабудове дэмакратыі. Паводле яго слоў, усё больш жанчын ўдзельнічаюць у органах улады. Аднак сярод кіраўнікоў дзяржаў і ўрадаў яны складаюць толькі 10%. Менш за трыццаць краін дамагліся 30-працэнтнага прадстаўніцтва жанчын у парламенце.
Пан Гі Мун падкрэсліў, што праца па дасягненні гендэрнай роўнасці павінна пачынацца значна раней: з таго, каб дзяўчынкі маглі паўнавартасна харчавацца, хадзіць у школу, атрымліваць медыцынскую дапамогу. І працягвацца на ўсіх этапах іх жыцця і ў розных галінах – ад бізнесу да кіраўніцтва краінай.

Юрый Сцяпанаў паводле матэрыялаў www.unmultimedia.org/radio/russian/

Жанчыны Гватэмалы патрабуюць абароны

viator — Thu, 21 Jul 2011 04:25:39 GMT

Цэнтральнаамерыканская краіна Гватэмала мае рэпутацыю адной іх самых небяспечных дзяржаў у свеце. Тут квітнее гвалт: забойствы, вымагальніцтвы, гандаль людзьмі, бандытызм.
Часта ахвярамі гвалту становяцца жанчыны: за апошнія 10 гадоў у Гватэмале загінула 5 тысяч жанчын і дзяўчат. Тут нават з’явіўся тэрмін – феміцыд, які азначае мэтанакіраванае забойства прадстаўніц жаночага полу.
Практычна ўсе напады і забойствы застаюцца беспакаранымі.

Юрый Сцяпанаў паводле матэрыялаў www.unmultimedia.org/radio/russian/