Прэзідэнт ЗША Барак Абама падпісаў закон, які атрымаў назву “Акт Лілі Ледбетэр аб справядлівай аплаце працы”. Кіраўнік адміністрацыі сказаў, што лічыць асабліва дарэчным тое, што першы падпісаны ім заканадаўчы акт пацвярджае фундаментальны прынцып Амерыкі – “Усе людзі створаны роўнымі”.
Закон названы у гонар жанчыны (на здымку яна размаўляе з прэзідэнтам), якая, прапрацаваўшы ў адной з фірм 19 гадоў, высветліла, што ўвесь гэты час ёй плацілі менш, чым мужчынам, якія выконвалі тыя ж самыя абавязкі. Яна падала іск, які вандраваў з адной судовай інстанцыі ў іншую, пакуль у 2007 годзе не дайшоў да Вярхоўнага суда ЗША. Той адхіліў позву, спасылаючыся на дзеючы закон, паводле якога справа павінна была быць узбуджана цягам 180 дзён пасля выяўлення факта дыскрымінацыі па прыкметах узросту, полу, расы, рэлігіі ці краіны паходжання.
Новы закон павялічвае тэрмін падачы іска да 360 дзён пасля налічэння несправядлівай зарплаты. Такім чынам, у работнікаў будзе больш магчымасцей для адстойвання сваіх правоў у выпадку іх парушэння наймальнікамі. Як падкрэсліў прэзідэнт Абама, мноства жанчын у Злучаных Штатах дагэтуль атрымліваюць меншую плату за роўную працу з мужчынамі, але зараз яны змогуць выкарыстаць закон, які цалкам на іх баку.