Звыш 30 актывістак з грамадскага аб’яднання “Беларуская арганізацыя працоўных жанчын” (БАПЖ) прааналізавалі дзейнасць сваёй НДА за мінулы год. Галоўным напрамкам летась была абрана якасць жыцця.
Агулам у мерапрыемствах БАПЖ узялі ўдзел больш за 6 тысяч чалавек. У прыватнасці, жаночае аб’яднанне разам з прадстаўнікамі асветнай установы “Цэнтр экалагічных рашэнняў” у чатырох гарадах правяло ток-шоу “Экалагічны прыгавор”, дзе гучаў заклік пры пакупцы звяртаць увагу на якасць прадуктаў харчавання.
Дзякуючы супрацоўніцтву з чальцамі грамадскага аб’яднання “Дыялог” выпушчана кніга “Харчаванне: ключ да здароўя”. У выданне, якое распавядае пра тэарэтычны і практычны бок праблемы, увайшлі дзённікі актывістак БАПЖ. У іх прадстаўніцы арганізацыі перадаюць свой досвед пераходу на здаровае харчаванне.