Па меры росту беспрацоўя ў ЗША назіраецца новая тэндэнцыя – мужчыны губляюць працу часцей, чым жанчыны.
Паводле апошніх статыстычных дадзеных, на мужчын прыпадае 82% звальненняў. Гэта тлумачыцца тым, што ў галінах, на якіх мацней за ўсё адбіўся эканамічны і фінансавы крызіс, – такіх, як будаўніцтва і прамысловая вытворчасць, – працуюць у асноўным мужчыны.
З іншага боку, жанчыны заняты галоўным чынам ў менш уражлівых сферах – напрыклад, у адукацыі і ахове здароўя, адзначае Шэрыл Касоун (на здымку), кансультантка па працаўладкаванні: “Адзіная галіна, дзе назіраецца рост колькасці працоўных месцаў – гэта ахова здароўя. У краіне па-ранейшаму не хапае медыцынскіх сёстраў”.
Кіроўца грузавіка Джоні Карнел спадзяецца, што сітуацыя палепшыцца. Ён згубіў работу два месяцы назад, і ўсе яго спробы знайсці новую завяршаюцца беспаспяхова: “Няма дня, каб я не шукаў работу, але зараз ніхто не наймае”.
Жонка Карнела Вераніка апынулася ў новым для сябе становішчы – адзінай карміцелькі ў сям’і з чатырох чалавек: “Я стараюся яго не папракаць, аднак гэтае здараецца неяк само сабой. Цяжка ігнараваць, што я зарабляю грошы, а ён – не”.
Некаторым мужчынам нялёгка змірыцца з такой пераменай роляў.
“Я нібыта гуляю ў хатнюю гаспадыню. Усё раблю ў хаце і займаюся дзецьмі”, – кажа беспрацоўны Джоні Карнел.
Паводле прагнозаў экспертаў, колькасць саюзаў, дзе грошы зарабляе жонка, будзе расці па меры паглыблення рэцэсіі. На шмат якіх сем’ях такая тэндэнцыя адаб’ецца негатыўна – паводле апошніх афіцыйных дадзеных, жанчыны па-ранейшаму зарабляюць на 20 адсоткаў менш за мужчын.