Пасля таго, як жыхарка горада Эскільстуны (губерня Сёдэрманланд, Швецыя) зрабіла два аборты, даведаўшыся, што чакае дзяўчынак, упраўленне сацыяльнай аховы насельніцтва рыхтуе новую інструкцыю, згодна з якой ультрагукавое даследаванне не можа праводзіцца толькі з мэтай высвятлення полу дзіцяці.
Кіраўнік гэтага ведамства Ёран Хэглунд адзначыў, што шведская сістэма аховы здароўя не павінна прапаноўваць даследаванні, мэта якіх вызначыць пол. Праўда, пакуль невядома, якім чынам гэта будзе сфармулявана.
Розніца з сённяшняй практыкай у тым, што медыцынскі персанал не будзе актыўна займацца атрыманнем менавіта гэтай інфармацыі. Даследаванне толькі дзеля высвятлення полу дзіцяці будзе магчымым, калі ўзнікнуць падазрэнні, што малое можа мець спадчынную хваробу, характэрную толькі для дзяўчынак ці толькі для хлопчыкаў. На прамое пытанне цяжарнай жанчыны медыкі будуць па-ранейшаму абавязаны адказаць, якога полу дзіця, калі медработнікі гэта ведаюць.
Ёран Хэглунд не ўпэўнены, што новая інструкцыя зменшыць колькасць абортаў па прычыне непажаданага полу дзіцяці: “Цяжка сказаць, бо мы не ведаем, колькі іх зараз. Я не думаю, што іх шмат. Лічу, што гэта маленькі крок у правільным напрамку. Я вітаю дыскусію, якая ўзнікла вакол згаданага пытання ў шведскім грамадстве. Яна сведчыць пра тое, што не толькі я, але і іншыя выступаюць супраць таго, каб абіраць пол дзіцяці”.