Да свайго допісу наш сябра з Маладзечна далучыў рапарт на тры перадачы за трэцяга, чацвёртага і пятага студзеня.
Наш прыхільнік з Горадні Валяр’ян Здановіч называе сябе “былым слухачом”, бо з моманту пераходу на зімовыя частоты ён страціў магчымасць сустракацца з намі ў радыёэфіры. Прычына? “Прыём на доўгіх і сярэдніх хвалях ў Горадні наогул адсутнічае (таксама як і ў летні час)”. У дыяпазоне 49 метраў а 16.30 паводле менскага часу на нашу трансляцыю накладваецца вяшчанне дзяржаўнага Беларускага радыё, якое “забівае” Варшаву. Крыху лепшая сітуацыя на кароткіх хвалях увечары. Вось як яе апісвае спадар Здановіч: “А 19.30 на 49 м зрэдку ўдаецца пачуць вас, і то не цалкам і не кожны дзень”. Гарадзенец спадзяецца на лепшы прыём пасля пераходу на больш высокія частоты: “...чакаю, што з пераходам на летні час вы зноў вярніцеся на хвалю 31 м”, чутнасць на якой заўсёды была добрай і а 16.30, і а 19.30.
Магіляўчанка Яўгенія Цюркіна адгукнулася на паведамленне ў адным з нашых выпускаў. Яна піша:
“Калі я слухала перадачу а 16.30 20 снежня, то там у навінах было сказана, што падпісаны нашым кіраўніком Указ № 555, які стварае перашкоду ў дзейнасці арганізацый, якія займаюцца аздараўленнем чарнобыльскіх дзяцей за мяжой”. Далей спадарыня Цюркіна згадвае, што наша радыё паведаміла аб “круглым стале”, што адбыўся ў сядзібе Партыі БНФ у Менску. На гэтай сустрэчы былі абмеркаваны магчымыя наступствы Указа № 555.
На думку нашай прыхільніцы, адразу бачна, што прэзідэнцкі дакумент рыхтаваўся без кансультацый з грамадскімі арганізацыямі. У выніку ўзніклі ўскладненні з замежнымі партнёрамі. Яўгенія Цюркіна апісвае сітуацыю свайго аб’яднання: “...наша Магілёўская гарадская дабрачынная грамадская арганізацыя “Водгук” ладзіць аздараўленне дзяцей праз прадстаўніцтва ірландскай НДА “Chernobyl Children’s Project International”. Ніякіх заўваг у ніводнага з бакоў няма і не было. Аднак нашы беларускія дзеці перажывалі, што можа сарвацца іх адпачынак у Ірландыі ў дні зімовых канікул”. Наша слухачка далей распавядае, што замежнікам прыйшлося адмыслова прыязджаць у Беларусь за дзесяць дзён да ад’езду школьнікаў, каб падпісаць новае пагадненне пра аздараўленне малых. Тымчасам, папярэдняя дамова паміж бакамі задавальняла і ірландцаў, і беларусаў.
Выглядае на тое, што, апроч партыі БНФ, на праблемы, выкліканыя прэзідэнцкім указам, не звярнулі ўвагу іншыя грамадскія і палітычныя арганізацыі.
У іншым лісце Яўгенія Цюркіна выказвае свае адносіны да планаў будаўніцтва ў Беларусі атамнай электрастанцыі. Такую ж тэматыку абраў для допісу яшчэ адзін наш даўні сябра – Бярнард Пакульніцкі з Меншчыны. Гэтыя цікавыя лісты я агучу ў наступнай перадачы.
А зараз шчыра дзякую ўсім тым, хто напісаў у нашу рэдакцыю!
Шаноўныя сябры! З нецярпеннем чакаю вашых лістоў на самыя розныя тэмы.
Калі ласка, пішыце на наступны адрас Польскага радыё для замежжа: а/с 45, г. Віцебск, 210015, Беларусь.
Свае лісты вы можаце таксама накіроўваць непасрэдна ў рэдакцыю. Адрас гучыць так: Беларуская служба Польскага радыё для замежжа, P. О. Box 46, 00-977 Warszawa, Польшча.
Нашы палескія слухачы могуць адпраўляць свае пісьмы на адрас: абаненцкая скрынка 28/78, г. Вінніца, 21027, Украіна.
З намі таксама можна вельмі аператыўна кантактаваць па электроннай пошце. Рэдакцыйны e-mail гучыць так:
by@polskieradio.pl.
Польскае радыё для замежжа пастаянна прысутнае ў Інтэрнеце. Таму, калі ласка, рэгулярна наведвайце наш рэдакцыйны сайт у Сеціве. Кожны дзень тут можна знайсці самую разнастайную тэкставую ды гукавую інфармацыю, а таксама фотаздымкі пра падзеі і факты ў Польшчы, Беларусі, Еўропе ды свеце. Адрас web-старонкі ў Інтэрнеце:
www.radyjo.net.
