Арыенціровачныя дадзеныя галоўнага статыстычнага ўпраўлення сведчаць, што летась у Польшчы адбылася рэкордная колькасць разводаў – амаль 72 тысячы. Такая ж лічба ўжо фіксавалася ў 2006 годзе. Тэндэнцыя на паніжэнне, якая назіралася ў 2007 і 2008 гадах, затармазілася.
Сучасная сям’я становіцца дагаворам, які мае рысы эмацыйнага кантракта. Калі гаснуць пачуцці і з’яўляюцца праблемы, два чалавекі лёгка ідуць на фармальны развод. Такія прычыны, як неабходнасць выхоўваць дзяцей ці наяўнасць агульнага жытла, не ўплываюць на гэтае рашэнне. Быць маці-адзіночкай ці бацькам-адзіночкам – гэта ўжо не праблема, а часам нават і перавага: напрыклад, яна дае першынство пры залічэнні ў дзіцячы садок.
Статыстычныя дадзеныя сведчаць, што менш трывалыя саюзы ў вельмі маладых людзей. У 2008 годзе 56% мужчын, што развяліся, былі ва ўзросце да 24 гадоў. Сярод жанчын, якія разарвалі шлюб, 75 адсоткаў былі маладзей за 24 гады.