Прэм’ер-міністр Польшчы Дональд Туск з’яўляецца прыхільнікам увядзення ў выбарчыя спісы роўнага прадстаўніцтва абодвух палоў. Пра гэтае паведаміла Генрыка Бохняж з Кангрэсу польскіх жанчын. Напрыканцы ліпеня яна сустракалася з кіраўніком ураду.
Бохняж адзначыла, што “прэм’ер падтрымае закон аб парытэце, але толькі ў выпадку, калі гаворка будзе ісці пра 50%”. Па словах актывісткі, Туску не падабаецца прапанова некаторых партый, якія кажуць пра 33-працэнтны удзел жанчын у выбарчых спісах. Бохняж атрымала ад прэм’ера пацверджанне пра тое, што яго палітычная структура – “Грамадзянская платформа” – прыме распараджэнне пра парытэтнае ўключэнне кандыдатак на найбліжэйшых мясцовых выбарах.

На думку актывісткі, у палове акругаў першыя месцы ў спісах павінны займаць жанчыны, у любым жа партыйным выбарчым спісе першыя шэсць месцаў мусяць дзяліцца па чарзе паміж прадстаўнікамі абодвух палоў.
Кангрэс польскіх жанчынаў мае амаль завершаны грамадзянскі законапраект аб парытэце ў выбарчых спісах. Неўзабаве ён трапіць на разгляд у польскі парламент – сейм.