Гендэрная асвета – неабходны інструмент для пабудовы ў Беларусі свабоднага грамадства на прынцыпах прыярытэтнасці правоў чалавека (дэмакратыя павінна "усведамляць і адчуваць” асаблівасці полу). Акрамя гэтага, яна важна для падтрымання сапраўднай нацыянальнай бяспекі дзяржавы: краіна не можа дазволіць сабе раскошу працягваць ігнараваць ці недавыкарыстоўваць патэнцыял любога полу, у прыватнасці, жанчын ва ўсіх сферах жыцця.
Без гендэрнай асветы ў Беларусі немагчыма ні ўсвядомленая пабудова сапраўднай прадстаўнічай дэмакратыі, ні функцыянаванне прававой дзяржавы, якая ўлічвае інтарэсы ўсіх грамадзян – і жанчын,  і мужчын.
Таму міжнародная праграма "Крок да роўнасці: уключэнне элементаў гендэрнай асветы ў адукацыйную сістэму Беларусі” закліканая стварыць устойлівы механізм падрыхтоўкі мультыплікатараў, якія будуць працаваць з педагогамі, навучэнцамі і іх бацькамі, змяняючы распаўсюджаныя стэрэатыпы пра сацыяльныя ролі мужчын і жанчын на больш прагрэсіўныя светапоглядныя мадэлі. 
Асвета ўзброіць выкладчыкаў і выхавацеляў сучаснымі ведамі ў галіне раўнапраўя палоў. Яна будзе спрыяць больш глыбокаму разуменню педагогамі сацыяльных і эканамічных інтарэсаў разнастайных грамадскіх груп, уключаючы, перш за ўсё, жаночае насельніцтва як буйную сацыяльна-палавую супольнасць.
Паспяховая рэалізацыя праграмы стане штуршком для выкарыстання яе станоўчага досведу не толькі асобнымі педагогамі ці навучальнымі ўстановамі, але й сістэмай адукацыі на мясцовым, рэгіянальным ці нацыянальным узроўні.

 

---