З 2009 года міністэрства працы і сацыяльнай палітыкі Польшчы намерана на два тыдні павялічыць дэкрэтны водпуск для мацярок, якія нарадзілі адно дзіця. Пазней будзе ўведзена магчымасць добраахвотнага падаўжэння дэкрэту на дадатковыя 6 тыдняў.
Прапанаваныя змены з задавальненнем успрымаюць трэд-юніёны. Ежы Лянгер з Незалежнага самакіруемага прафсаюза “Салідарнасць” (“Solidarność”) падкрэслівае, што прафаб’яднанне будзе падтрымліваць усе дзеянні на карысць сям’і. Паводле ягонага меркавання, большасць наймальнікаў мусіць паважаць права на дадатковую – хаця і неабавязковую частку – дэкрэтнага водпуску. Е. Лянгер: Гэтае рашэнне нагадвае японскае правіла. Яны там таксама маюць права на дадатковы дэкрэтны, але ён неабавязковы, і таму ім не карыстаюцца, баючыся страціць працу. Але я спадзяюся, што гэта будзе датычыць толькі часткі польскіх наймальнікаў, бо большасць з іх са зразуменнем адносіцца да гэтага пытання й будзе ставіцца да маладых жанчын так, як і ў дачыненні да сваёй сям’і. Паводле слоў Малгажаты Русевіч з Польскай канфедэрацыі прыватных працадаўцаў “Левіафан” (“Lewiatan”), увядзенне неабавязковай часткі дэкрэтнага адпачынку з’яўляецца крокам у добрым напрамку. Аднак гэтае правіла ды звязаныя з ім гарантыі працаўладкавання некарысныя для наймальнікаў, бо прывядуць да адсутнасці працаўніка й абавязковай рэарганізацыі працы. Замена работніка выклікае выдаткі, звязаныя з пошукам новага часовага працаўніка. А гэта можа прывесці да пэўнага застою ў фірме. Таму “Lewiatan” папярэджвае, што “прадаўжэнні”, “гарантыі працаўладкавання” могуць некарысна паўплываць на бізнес. Да таго ж, новаўвядзенні могуць адмоўна адбіцца на палітыцы прыняцця жанчын на працу ў фірму.
Бізнесоўцы лічаць, што ўрад найперш павінен сканцэнтравацца на скарачэнні дадатковых выдаткаў, якія працадаўца нясе, прымаючы на работу маладую кабету, бо ўжо цяпер фірме лепш прымаць мужчыну. Прадпрымальнікі за тое, каб урадоўцы ўзмацнілі намаганні, каб яслі ды дзіцячыя садкі былі больш даступнымі. Зараз, паводле польскага заканадаўства, дэкрэтны водпуск на першае дзіця працягваецца 18 тыдняў, на другое й кожнае наступнае – 20 тыдняў. Частку з гэтага перыяду (28 дзён) можа сядзець у дэкрэтным бацька немаўляці, калі маці вырашыць скараціць свой водпуск.
