Полькі маюць абмежаваны доступ да ўлады. На гэта гавораць вынікі даследавання, праведзенага па замове офіса Еўрапейскага парламента. Згаданая выснова адносіцца да выбараў ўсіх узроўняў улады, а не толькі кампаніі ў Еўрапарламент.
Прафесарка Рэната Семеньска з Варшаўскага універсітэта тлумачыць, што ўсё гэта залежыць ад спісаў, якія фармуюцца выбарчымі камітэтамі. Калі яны складаюцца, з прычыны забабонаў і стэрэатыпаў жаночы пол дыскрымінуецца: “Жанчыны рэдка трапляюць у спісы кандыдатаў і яшчэ радзей яны апынаюцца на першых месцах. А звыш траціны галасоў прыпадае на першыя тры радкі. Такім чынам, калі жанчын увогуле няшмат, а на першых месцах – іх надзвычай мала, то яны, па сутнасці, не маюць аніякіх шанцаў”.
Сацыёлаг Рэната Семеньска звяртае увагу, што адзін са спосабаў выраўноўвання мажлівасцей жанчын – юрыдычна гарантаваць ім пэўную колькасць месцаў у выбарчых спісах. Экспертка спадзяецца, што паступова будуць знікаць стэрэатыпы, якія абмяжоўваюць шанцы жаночага полу трапіць ва ўладу.