Добрага часу сутак, паважаныя сябры!
Сёння ў “Рэдакцыйнай пошце” чакаецца важны момант: абвяшчэнне ўмоў другога этапу ваенна-гістарычнага конкурсу. Калі ласка, падрыхтуйцеся, каб занатаваць ягоныя пытанні і заданні. Пакуль вы гэтае робіце, пяройдзем да карэспандэнцыі ад аднаго з нашых даўніх сяброў.
Вячаслаў Сухарэбскі, слухач з вёскі Русіны Баранавіцкага раёна Берасцейскай вобласці, прыслаў водгук на гендэрныя матэрыялы, якія з’яўляліся ў апошні час у “Рэдакцыйнай пошце”. Гэта цікавы і неадназначны ліст, за што я вельмі ўдзячны яго аўтару.
Тыдзень назад вы маглі пачуць мае каментары некаторых выказванняў нашага сябра. Сёння я працягну абмяркоўваць допіс спадара Сухарэбскага.
Наш слухач кажа, што чым раней жанчына стане маці, тым болей шанцаў для здаровага патомства.
Каментую. Зараз у высокаразвітых краінах свету, у тым ліку ў Польшчы і Беларусі, узрост першых родаў значна павялічыўся. Галоўным чынам, гэта звязана з большай, чым раней, уключанасцю жанчын у сацыяльна-эканамічнае жыццё. Спачатку адукацыя, потым – кар’ерны рост. І толькі затым – усвядомленае рашэнне пра нараджэнне дзіцяці.
Апроч таго, на здароўе дзяцей сур’ёзна ўплывае ўзровень развіцця медыцынскага абслугоўвання. Напрыклад, не зважаючы на позні ўзрост першародзячых, смяротнасць немаўлятаў у Еўропе, Паўночнай Амерыцы ці Аўстраліі ў дзесяткі разоў меншая, чым у падаўляючай большасці афрыканскіх рэспублік, дзе памірае ў сярэднім кожнае дзесятае малое. На аднаго лекара ў гэтых дзяржавах прыходзіцца прыкладна ў трыццаць разоў больш жыхароў, чым у самых багатых краінах.
Спадар Сухарэбскі лічыць, што “розніца ва ўзросце дзяцей не павінна перавышаць двух гадоў”.
Мне здаецца, што хай лепей дзіця падрасце, каб даць хоць нейкі адпачынак маме, фізічна і псіхалагічна стомленай ад родаў і нагляду за малым. Уявіце сабе сітуацыю, калі ёсць дзіцёнак, за якім яшчэ трэба ўважліва сачыць, а тут з’яўляецца немаўля, якое неабходна пастаянна пільнаваць. Дарэчы, не варта забывацца і пра тое, што цяжарнасць – гэта таксама велізарны выклік для жанчыны. Спалучаць яе з выхаваннем зусім малога незвычайна цяжка. 
Вячаслаў Сухарэбскі працягвае: “...а дзяцей ў сям’і павінна быць як мінімум трое”.
Я перакананы, што важная не колькасць, а якасць. Лепей добра выхаваць аднаго-двух дзяцей, чым напладзіць вялікае патомства і не спраўляцца з ім. Між іншым, колькасць малых у сям’і моцна залежыць ад магчымасцяў і патрэбаў. Ці варта нараджаць дзяцей, не звяртаючы ўвагу на матэрыяльнае становішча? Сумняваюся.
Дарэчы, раней, калі не было пенсій, дзеці даглядалі пажылых бацькоў. Зараз у развітых краінах старасць фінансавана забяспечана. Матэрыяльная дапамога дзяцей не патрэбна. Натуральна, што і колькасць патомства знізілася.
І апошняе ў гэтым пункце. Вялікі няспынны рост насельніцтва можа прывесці да грандыёзных цяжкасцей, якія мы назіраем у асобных краінах. У першую чаргу, я тут прыгадваю Бангладэш. У ёй жыве ў 14 разоў больш людзей, чым у Беларусі, хаця плошча краіны менш за памеры РБ у 1,4 разы. З-за перанаселенасці ў Бангладэш велізарныя эканамічныя, сацыяльныя і экалагічныя праблемы. Нам гэта трэба?
Працяг чытання і каментавання ліста спадара Сухарэбскага роўна праз тыдзень.

 

А цяпер – увага! – новыя пытанні і заданні ваенна-гістарычнага конкурсу:

 

Нагадаю, што конкурс ладзіцца Беларускай рэдакцыяй Польскага радыё для замежжа і недзяржаўнымі арганізацыямі Віцебска і Гданьска з нагоды 70-годдзя з пачатку ІІ сусветнай вайны. Ён праходзіць у тры месячныя этапы. Першы з іх адбыўся у чэрвені. Другі этап пройдзе ў ліпені. Трэці – у жніўні.
Пасля кожнага з этапаў 5 пераможцаў атрымаюць цікавыя ўзнагароды. Гран-пры будзе радыёпрыёмнік з рознымі дыяпазонамі, у тым ліку з кароткімі хвалямі. Чакаецца, што вынікі першага этапу будуць абвешчаныя па радыё 10 ліпеня. Пераможцы другога стануць вядомыя 7 жніўня. Прызёры апошняга этапу будуць названыя ў “Рэдакцыйнай пошце” 11 верасня.
Апроч таго, прынамсі адзін удзельнік, які паспяхова справіцца з усімі трыццаццю пытаннямі і заданнямі конкурсу, за кошт арганізатараў паедзе ў Польшчу ўвосень 2009 года. Мяркуецца, што пераможца цягам некалькіх дзён наведае Варшаву і марское ўзбярэжжа.
Калі ласка, прысылайце адказы на конкурс на адрас Польскага радыё для замежжа: а/с 45, г. Віцебск, 210015, Беларусь.