Гэта лозунг новай сацыяльнай кампаніі супраць гвалту і прымусу ў сям’і, якая праходзіць у Польшчы. Плакаты, рэкламныя ролікі і грамадскія акцыі будуць пераконваць палякаў у тым, што варта прысвяціць больш часу на размовы і выхаванне дзяцей.
У Польшчы ў грамадстве ўтрымліваецца высокі працэнт падтрымкі выкарыстанню фізічных формаў уздзеяння ў сям’і. Паводле меркавання спецыялістаў, ахвярамі гвалту ў сям’і найчасцей становяцца жанчыны і дзеці. Супраць гэтых настрояў і перакананняў будзе змагацца сацыяльная акцыя пад назвай “Люблю. Не крычу. Не б’ю. Прысвячаю час”. У акцыі возьмуць удзел вядомыя акцёры і журналісты, якія будуць пераконваць палякаў, што любячыя бацькі не толькі не б’юць дзяцей, але хочуць і ўмеюць з імі размаўляць і бавіць час.
У акцыі будуць удзельнічаць шматлікія міністэрствы і палітыкі, якія хочуць змяніць заканадаўства, каб абмежаваць выкарыстанне гвалту ў сем’ях. На думку Конрада Вайтэркоўскага з Нацыянальнага цэнтра кампетэнтнасці, аднаго з арганізатараў акцыі, большасць палякаў не разумеюць,  чаму нельга біць непаўналетніх: “У Польшчы 50 працэнтаў насельніцтва згодныя, каб выкарыстоўваліся цялесныя кары ў дачыненні да дзяцей. 69% бацькоў прызнаюць, што фізічныя пакаранні з’яўляюцца метадам выхавання, які найбольш выкарыстоўваецца. Гэта – ніякі не метад, гэта параза бацькоў. Гэта значыць, што ўсе іншыя сродкі не прынеслі выніку. Наша кампанія скіраваная да бацькоў. Яе мэта – паказаць, што вельмі важна не вучыць дзяцей агрэсіі. Трэба імкнуцца з імі размаўляць, каб даць ім любоў, добрыя адносіны і цёплую атмасферу ды пачуццё бяспекі. Ніколі немагчыма даць дзіцяці пачуццё бяспекі, калі на яго крычаць, б’юць і выкарыстоўваюць”.
Пытанне ўжывання сілы і гвалту ў сям’і становіцца ўсе часцей аб’ектам грамадскай увагі. У шматлікіх еўрапейскіх краінах недзяржаўныя арганізацыі ў супрацоўніцтве з дзяржорганамі ладзяць сацыяльныя кампаніі, каб змяніць падыход людзей да згаданай праблемы.