Польская моладзь вельмі мала ведае пра секс. Гэта вынікае з падрыхтоўкі да рапарта пра сексуальнае жыццё палякаў. Ягоным аўтарам з’яўляецца нефармальная група сексуальных адукатараў “Пантон” (Grupa Edukatorów Seksualnych “Ponton”).
“Лета – гэта час, калі маладыя людзі выязджаюць, ўлюбляюцца ды часта ўваходзяць у рызыкоўныя сексуальныя кантакты,” – гаворыць Альгерд Вейнер, дырэктар фірмы, якая выпускае прэзерватывы. Пасля канікулаў колькасць захворванняў венерычнымі хваробамі вырастае на 15%.
Менавіта таму да моладзі была накіраваная адукацыйная кампанія групы “Пантон” пад назовам “Пакаштуй жыцця” (“Smakuj życie”). Улетку ў яе межах у курортных мясцінах па ўсёй Польшчы прайшлі канцэрты, турніры, конкурсы. Падчас імпрэзаў моладзь магла размаўляць з сексолагамі ды атрымліваць бясплатныя прэзерватывы.

“Мы вялі заняткі ў польскіх ліцэях і трэба сказаць, што ўзровень ведаў страшэнна нізкі,” – гаворыць Магдалена Анкерштэйн-Бартчак з Фонду грамадскай адукацыі (Fundacja Edukacji Społecznej). Дастатковымі ведамі ў галіне эротыкі не могуць пахваліцца таксама дарослыя палякі. На размову са спецыялістам пра свае сексуальныя праблемы адважваецца толькі 25% параў, бо гэта надалей тэма табу.