Міжнародная няўрадавая арганізацыя "Dress for Success” ("Сукенка для поспеху”), якая дапамагае жанчынам вярнуцца на рынак працы, пачала дзейнасць у Польшчы. НДА купляе касцюмы і абутак, плаціць за прафесійны макіяж і наведванне стаматолага, вучыць культурна выказвацца, весці перамовы з наймальнікам, правільна складаць CV (curriculum vitae). Арганізацыя працуе з дзяўчынамі з выпраўленчых устаноў, з жанчынамі, якія выйшлі з турмы, з ахвярамі побытавага гвалту.
У свеце асацыяцыя "Dress for Success” дзейнічае з 1997 года. Упершыню ў Польшчы яна падрыхтавала выпускніц (асобныя з іх на групавым здымку) у другой дэкадзе леташняга кастрычніка. Гэта былі 60 дзяўчат з моладзевага выпраўленчага цэнтра (Młodzieżowy Ośrodek Wychowawczy) у Радзянкуве (Сілезскае ваяводства).
"Dress for Success” заснавала ў Нью-Йорку жанчына з польскім прозвішчам Нэнсі Люблін (на здымку), калі атрымала ў спадчыну ад сваёй прабабулі 5 тыс. долараў.

Дагэтуль арганізацыя дапамагла прыблізна 350 тысячам жанчын ва ўсім свеце. Амаль 75% з іх знайшлі працу.