Кожны падручнік павінен прайсці праверку з пункту гледжання наяўнасці ў ім стэрэатыпаў і дыскрымінацыйнага кантэксту, – лічыць упаўнаважаная польскага ўраду па роўных адносінах Агнешка Казлоўска-Раевіч (на здымку). Пра гэта яна выказалася падчас канферэнцыі "Антыдыскрымінацыйная адукацыя як выклік для адміністрацыі і судовай сістэмы”, што адбылася 16 траўня ў Варшаве.
Казлоўска-Раевіч лічыць, што кожны падручнік па кожным прадмеце павінен быць правераны экспертам па правах чалавека, які будзе ацэньваць, ці кніга не ўтрымлівае якой-небудзь дыскрымінацыі ў адносінах да любой сацыяльнай групы. Прапануецца, каб правяраліся нават падручнікі па матэматыцы.
Як мяркуе ўпаўнаважая ўраду, правільную пазіцыю лягчэй сфармаваць у дзіцячыя гады, чым выкараняць стэрэатыпы ў дарослым жыцці.
Акрамя гэтага, Агнешка Казлоўска-Раевіч падкрэсліла, што антыдыскрымінацыйная адукацыя таксама вельмі важная ў выпадку чыноўнікаў, якія працуюць непасрэдна з грамадзянамі. Іх паводзіны уплываюць на вобраз дзяржавы – справядлівай або несправядлівай, – які складваецца ў грамадзян.
Дзеячы па барацьбе са стэрэатыпамі лічаць, што ў польскіх падручніках жанчыны, мужчыны, хлопцы і дзяўчаты прадстаўленыя стэрэатыпна. Сям’я заўсёды поўная. Няма ў ёй, напрыклад, інвалідаў. Можна таксама сустрэць у падручніках інфармацыю, якая не адпавядае рэчаіснасці, напрыклад, пра гомосексуалізм.