Першыя жанчыны-спецназаўкі з’явяцца ў сталіцы. Полк міліцыі спецыяльнага прызначэння гарадскога ўпраўлення ўнутраных спраў Мінгарвыканкама хутка папоўніцца дзесяццю жанчынамі. Як паведамляе БЕЛТА са спасылкай на камандзіра палка палкоўніка Юрыя Падабеда, кандыдаткі ў спецназаўкі ўжо ёсць. Пры адборы ім не будзе рабіцца паслабленняў, у тым ліку і па фізічнай падрыхтоўцы. Перавагу будуць аддаваць былым ці дзеючым спартсменкам. Жанчыны-спецназаўкі будуць выконваць нароўні з мужчынамі задачы па ахове грамадскага парадку, забяспечваць бяспеку пры правядзенні масавых мерапрыемстваў. Важнай часткай іх дзейнасці стане асабісты дагляд жанчын, да якога дагэтуль прыцягваліся жанчыны з пашпартна-візавай службы і іншых падраздзяленняў міліцыі, якія не маюць спецыяльнай падрыхтоўкі.
Зараз у сталічным спецназе служыць толькі адна жанчына-афіцэр, якая выконвае абавязкі псіхолага.