Расійскія сацыёлагі правялі апытанне, каб высветліць, якія прафесіі мужчыны лічаць найменш прыдатнымі для прадстаўніц жаночага полу. У выніку вызначыліся сем сфер, якія мужчыны прызнаюць выключна сваімі. Аднак аргументаваць сваё меркаванне ім няма чым.
Так, першай у спісе выключна мужчынскіх прафесій ідзе вайсковая служба. Тымчасам у расійскай арміі паспяхова служаць каля ста тысяч жанчын, а яшчэ паўмільёна дам носяць форму розных сілавых ведамстваў. На другім месцы – пажарныя, што ў Расіі на самой справе рэдкасць. Трэцяй сферай, куды мужчыны прапанавалі не дапускаць жанчын, спасылаючыся на адсутнасць у апошніх сістэмнага мышлення і недахоп логікі, з’яўляюцца інфармацыйныя тэхналогіі. Аднак, нягледзячы на разнастайныя анекдоты пра “бландзінак”, імкліва расце колькасць праграмістаў, аналітыкаў, веб-дызайнераў жаночага полу. Далей у спісе нежаночых заняткаў – хірургі, слесары-будаўнікі-шпалаўкладчыкі і кіроўцы. І нарэшце, нежаночай мужчыны лічаць фінансавую сферу. Аднак рэчаіснасць даказвае, што кампаніі, у фінаддзелах якіх працуюць жанчыны, квітнеюць менавіта дзякуючы дамам.