Каля трыццаці дабрачынных праектаў рэалізуе ў Беларусі Менскі міжнародны клуб жонак паслоў. Кіруе арганізацыяй Зейнаб Эльгодж, супружніца амбасадара Лівіі ў нашай краіне. Грошы на рэалізацыю дабрачынных праектаў жонкі дыпламатаў збіраюць падчас традыцыйных веснавых дабрачынных вячэраў, калядных кірмашоў. Выкарыстоўваюцца таксама прыватныя ахвяраванні.

Менскі міжнародны клуб супружніц замежных паслоў дапамагае лякарням, дамам-інтэрнатам, спецыялізаваным медыцынскім установам не толькі ў сталіцы, але і на перыферыі, у прыватнасці, ў Жодзіне, Беразіне, Валожыне, Барысаве. Дапамогу ад супружніц паслоў атрымліваюць дзве менскія школы для дзяцей з праблемамі зроку і слыху, Беларускі дзіцячы хоспіс, грамадскае аб’яднанне “Дзеці ў бядзе”, арганізацыя хворых на ДЦП дзяцей “Пераадоленне” ды іншыя структуры. На сродкі, выдаткаваныя клубам, абсталяваная адна з палат у жаночым аддзяленні псіханеўралагічнага дыспансера.