Нарвежскія жанчыны пачалі беспрэцэдэнтную атаку супраць засілля мужчын у бізнесе. Калі дамы атрымаюць перамогу, мноству ўплывовых мужчын пагражае прымусовае звальненне.

Для саўладальніка банка “Netfonds Holding” надышлі чорныя дні. Урад вінаваціць яго ў парушэнні закона, паводле якога 40% месцаў у радзе дырэктараў любой нарвежскай фірмы павінны займаць жанчыны. “Netfonds Holding” апынуўся ў першым апублікаваным чорным спісе з 12 кампаній, дзе гэтае правіла не выконваецца.

“Я працую ў мужчынскім свеце, – перажывае банкір. –  Паводле закона я павінен перадаваць месцы ў радзе дырэктараў дамам-прафесіяналкам, але іх складана адшукаць у фінансавым сектары. Гэтае вялікае выпрабаванне для ўсяго бізнесу. Нам прыйдзецца звальняць дасведчаных людзей, з якімі мы працавалі па 20 – 30 гадоў, і змяняць іх невядома на каго”.

Нарвегія ўсталявала новы рэкорд – зараз тут самае вялікае прадстаўніцтва г. зв. “слабага полу” ў бізнесе. Гэта прымусовая квота, якая прыйшлася не даспадобы большасці мужчын-бізнесменаў.

У 2002 году толькі 7,1% чальцоў рад дырэктараў публічных акцыянерных кампаній Нарвегіі былі жанчынамі. Атака на вялікі бізнес пачалася роўна 5 гадоў назад з прыняцця закона, паводле якога жаночая квота ў рáдах дырэктараў павінна была складаць не меней 40% да 1 студзеня 2008 года.

Кампаніям, што парушаюць закон, пагражалі ўсялякімі карамі, аж да ліквідацыі.

Тады большасць кіраўнікоў спешна ўвялі ў рáды дырэктараў па 2 – 4 дамы. І хоць гэтага недастаткова для выканання закона, нарвежскія жанчыны ўжо святкуюць першую сур’ёзную перамогу.

Па дадзеных уплывовага амерыканскага банка “Goldman Sachs”, захаванне гендэрнай роўнасці і паўнавартаснае выкарыстанне жаночых эканамічных талентаў спрыяе павелічэнню прыбыткаў кампаній.