Бізнес як сфера дзейнасці агрэсіўных і рызыкоўных “альфа-самцоў”. Гэткі сексісцкі, але надзвычай распаўсюджаны ў грамадстве міф наважылася разбурыць група амерыканскіх даследчыкаў-эканамістаў.

Каманда пад кіраўніцтвам Даніэла Турбана зыходзіла з таго, што сацыяльныя забабоны адносна бізнеса могуць насамрэч абмяжоўваць рэальныя магчымасці абодвух палоў. У практычным сэнсе гаворка ідзе пра тое, што жанчынам звычайна цяжэй даецца рашэнне абраць для сябе прадпрымальніцкую кар’еру.

Дзеля вывучэння маштабаў, у якіх распаўсюджаны забабоны, даследчыкі прапанавалі групе студэнтаў-эканамістаў прачытаць колькі фіктыўных бізнес-планаў і ацаніць іх магчымую паспяховасць. Адны з гэтых прыдуманых прадпрымальніцкіх сюжэтаў змяшчалі ўказанні на пол таго, хто ў ім удзельнічаў, іншыя былі “нейтральнымі” .

Вынік аказаўся наступны: калі ў аналізаваным матэрыяле фігураваў прадпрымальнік-мужчына, паспяховасць ягонага праекта ацэньвалася студэнтамі нашмат вышэй, чым жаночага. Калі ж распазнаць пол бізнесмена было аніяк немагчыма, тыя самыя праекты ацэньваліся практычна аднолькава.

Прафесар Турбан, між іншым, высунуў дапушчэнне, што ўкараненню сексісцкага стэрэатыпу адносна прафесіі прадпрымальніка спрыяе, між іншым, сама міфалагізацыя “мужчынскіх рысаў”. У практычным сэнсе ён дае наступную рэкамендацыю: хочаш далучыць жанчын да прадпрымальніцтва – пазбаў бізнес “полу”.