Улетку людзі звычайна спрабуюць схавацца ад спякоты, пакідаючы пры гэтым на целе мінімальную колькасць вопраткі. Аднак не ўсім гэта даспадобы. У Іране ісламская паліцыя нораваў збіраецца актывізаваць пераслед жанчын, якія парушаюць мусульманскія звычаі.

Яна будзе сачыць, каб іранкі не з’яўляліся на вуліцы ў “непрыстойным выглядзе”, гэта значыць, з аголенымі часткамі цела. Непрыемнасці з’явяцца не толькі ў жанчын, але і ў крамаў, якія гандлююць адзеннем, якое не адпавядае нормам ісламу. Такім чынам, у Іране вядзецца барацьба з “разбэшчваннем грамадства”.

Пасля перамогі ў 1979 годзе ў гэтай краіне ісламскай рэвалюцыі, жанчынам загадваюць закрывацца прасторнай адзежай, якая цалкам хавае контуры цела. Парушальніцы падлягаюць фізічнаму пакаранню, штрафу або турэмнаму зняволенню. Мусульманскія нормы маралі рэгулююць таксама вонкавы выгляд прадстаўнікоў “моцнага” пола. Мужчына з “заходняй” стрыжкай таксама можа быць арыштаваны або аштрафаваны.