Жорсткі кантроль, пагрозы, збіванне і нават забойства ад рукі сваяка-мужчыны – гэта не сцэнарый галівудскага трылера, а суровая рэчаіснасць шматлікіх жанок, якія жывуць у патрыярхальных супольнасцях у самых розных кутках свету. Так званыя “злачынствы гонару”, гэта значыць, пакаранне дзяўчат і жанчын, якія згубілі цнатлівасць да шлюбу, былі згвалтаваныя ці выйшлі замуж без згоды сямейнікаў, здараюцца ў Бангладэш, Егіпце, Іарданіі, Палесцінскай аўтаноміі, Сірыі, Ліване, Турцыі ды іншых краінах.

Схавацца ад гэтага жаху, атрымаць прытулак у іншай краіне не заўсёды проста.

Жаночыя грамадскія арганізацыі Швецыі, якія дапамагаюць такім жанчынам, лічаць, што ў каралеўстве вельмі цяжка атрымаць прытулак на падставе пагрозаў, звязаных з такім своеасаблівым разуменнем гонару ў некаторых культурах. Прадстаўніцы гэтых НДА мяркуюць, што міграцыйныя службы краіны павінны быць больш прыхільнымі да замежніц, якія пацярпелі ад жорсткіх патрыярхальных звычаяў ці могуць стаць ахвярамі такіх злачынстваў.