18 жніўня ў Нацыянальнай бібліятэцы Беларусі адчынілася тэматычная кніжная выстаўка “Гандаль людзьмі – новае рабства ў глабальным свеце”, прысвечаная Міжнароднаму дню памяці ахвяр гандлю нявольнікамі і яе ліквідацыі.
Ён штогод адзначаецца 23 жніўня па рэкамендацыі ЮНЕСКА у памяць аб паўстанні нявольнікаў на Гаіці ў 1791 годзе, якое паклала пачатак працэсу ліквідацыі сістэмы рабства.

Нявольніцтва з’яўляецца беспрэцэдэнтнай трагедыяй і адной з самых цёмных старонак чалавечай гісторыі. Нягледзячы на тое, што рабства было адменена і асуджана на міжнародным узроўні, яно па-ранейшаму існуе ў новых формах і закранае мільёны людзей ва ўсім свеце. Гандаль людзьмі – гэта глабальная праблема, небяспека якой у тым, што ніводная багатая ці бедная краіна не ў змозе яе пазбегнуць. Па дадзеных ААН, кожны год мільёны людзей, у асноўным жанчыны і дзеці, становяцца ахвярамі падману і гвалту, ператвараюцца ў “жывы тавар” і падвяргаюцца эксплуатацыі. Таму адкрыццё выстаўкі вельмі актуальнае.

Экспазіцыя знаёміць з даследаваннямі феномена рабства і гандлю людзьмі, а таксама з міжнародна-прававымі аспектамі рэгулявання гэтай праблемы і яе процідзеянню ў рамках ААН, Еўрапейскага Саюза, АБСЕ і Рады Еўропы.
На выставе прадстаўлена каля 60 дакументаў на рускай, ангельскай, французскай і нямецкай мовах. Вялікую частку экспазіцыі складаюць выданні міжнародных арганізацый: кнігі, брашуры, матэрыялы ААН, перыёдыка.

Экспазіцыя прызначана для шырокага кола чытачоў, прадстаўнікоў праваахоўных органаў, а таксама для суддзяў, адвакатаў, выкладчыкаў і студэнтаў вышэйшых навучальных устаноў, усіх зацікаўленых барацьбой з міжнародным рабствам і гандлем нявольнікамі.
Выстава будзе працаваць да 14 верасня.