У балтыйскіх дамачак “за 40” спыталі, які ўзрост яны лічаць парою найбольшага росквіту для жанчыны. Латвійкі сказалі – “35”, летувіскі (літоўкі) – “37” , а эстонкі дык і ўвогуле “40”. Праўда, і тым, і другім, і трэцім падаецца, што астатнія (пэўна, мужчыны) гэтага шчаслівага перыяду не бачаць, заніжаючы жаночае “акмэ” да нейкіх там 30 гадкоў.
Стаўленне да ўласнага ўзросту кабеты выяўлялі пад час Інтэрнет-апытання ў межах кампаніі “Pro-age”, зладжанага ў краінах Балтыі вядомай гандлёвай маркай “Dove” (англа-нямецкага канцэрна “Unilever”). Прыбалтыйскія жанкі прадэманстравалі ў адказах на дзіва высокую ўпэўненасць у паспяховасці свайго ўзросту і задаволенасць жыццём (болей за палову апытаных).
Апісваючы ўласныя найбольш адметныя рысы, латвійкі зазначылі, што яны добразычлівыя і сардэчныя, летувіскі – што ўпэўненыя, элегантныя і самотныя, а эстонкі падкрэслілі сваю актыўнасць, жыццярадаснасць і…стомленасць. Болей за палову дам заявілі ў апытанні, што расходуюць на догляд за сабою столькі часу, колькі захочуць.
На гэтым аптымістычным фоне ў выніках апытання трохі здзіўляе звышсціплая ацэнка рэспандэнткамі ўласнае прыгажосці. Адно 17% летувісак, 9% латвіек і 6% эстонак лічаць сябе красунямі. Выглядае дысанансам, як параўнаць з 37% амерыканак, 40 % францужанак, 63 % немак і ажно 73 % бразіліек.
Гендэрныя эксперты з Балтыі тлумачаць гэткую мясцовую сціпласць не столькі рэалізмам у ацэнцы ўласнае пекнасці, колькі падкрэслена другасным характарам якасцяў знешнасці для гэтых жанчынаў. Асабліва, калі параўноўваць “прыгажосць” з такімі рэчамі, як “досвед”, “навыкі”, “камунікабельнасць” – багаж, трымаючыся якога, жанчыны паспяхова канкуруюць з маладзейшымі на мясцовых рынках працы.