Іракскія ўлады маюць намер абвясціць тэрміновы набор жанчын для працы ў паліцыі ў сувязі з ростам у апошні час тэрактаў, здзейсненых смяротніцамі.

У сталіцы краіны Багдадзе на ўваходах у дзяржаўныя ўстановы, на шматлюдныя рынкі і ў крамы будуць усталяваныя дадатковыя 120 кантрольных пунктаў для праверкі жанчын. Гэтыя захады робяцца таму, што арганізацыя “Аль-Каіда” пачала актыўна выкарыстоўваць для правядзення тэрактаў смяротніц, якія лёгка могуць прайсці праз КПП.

Паводле дзейсных у Іраку грамадскіх норм, мужчыны не могуць абшукваць супрацьлеглы пол. Акрамя таго, свабодны крой жаночай мусульманскай вопраткі – абаі – робіць непрыкметным для навакольных замацаваную на целе выбухоўку.
За ўвесь пасляваенны перыяд у Іраку было здзейснена самаменш 44 тэрарыстычных актаў з удзелам жанчын-смяротніц. Сярэдні ўзрост шахідак – 15 – 35 гадоў.