Цягам найбліжэйшых гадоў пакаленне бэбі-бума – а гэта каля 77 мільёнаў амерыканцаў – увойдзе ў пенсійны ўзрост. Прыблізна траціна з іх плануюць працягнуць бясплатна працаваць на карысць грамадства ў якасці валанцёраў. Іх здароўе лепей, чым у папярэдніх пакаленняў, працягласць жыцця – даўжэй, і, акрамя гэтага, у іх высокая матывацыя: ім карціць дапамагаць іншым людзям добрымі справамі.
Супрацоўніца Вашынгтонскага інстытута гарадской гаспадаркі Шыла Зідлеўскі, сааўтарка даследавання “Армія добраахвотнікаў”, адзначыла ў інтэрв’ю “Голасу Амерыкі”, што прыток валанцёраў пенсійнага ўзросту будзе мець у ЗША сур’ёзныя сацыяльна-эканамічныя наступствы ў найбліжэйшыя 10 – 20 гадоў: “Паводле нашых падлікаў, у 2002 годзе ўклад добраахвотнікаў у эканоміку, уключаючы дагляд за членамі сямей, складаў 160 млрд.  долараў. Пры пераразліку на сённяшні курс долара і з улікам большай колькасці валанцёраў пенсійнага ўзросту сёлета іх уклад варта ацаніць у 200 мільярдаў”.

Як мяркуе сп-ня Зідлеўскі, гэта толькі першыя прыкметы моцнага прытока добраахвотнікаў. Калі іх стане шмат, то складзецца сітуацыя, ад якой выйграюць усе. Паводле дадзеных Шылы Зідлеўскі, сярод валанцёраў пераважаюць жанчыны, якія маюць добрую адукацыю і з’яўляюцца актыўнымі членамі рэлігійных супольнасцяў. Яна адзначыла: “Мноства даследаванняў дэманструе, што такая праца вельмі станоўча ўплывае на фізічнае і псіхічнае здароўе добраахвотнікаў. Гэта азначае, што пенсіянеры адчуваюць сябе лепей, і менш выдаткоўваюць на лячэнне. Такім чынам, у наяўнасці – дадатковая эканомія сродкаў”.

Як адзначаюць эксперты, у большасці даследаванняў уклад добраахвотнікаў ацэньваецца кансерватыўна, але чакаемы рост іх колькасці прывядзе да значнага станоўчага ўздзеяння на жыццё ўсяго грамадства.

 

Юрый Сцяпанаў паводле матэрыялу www.voanews.com/russian/index.cfm