155 тысяч Br. Менавіта столькі каштуе сярэднестатыстычнай беларусцы кожны выпадак хатняга гвалту. Летась у краіне зафіксавана 2734 падобныя здарэнні. Такім чынам, страты ўсіх пацярпелых жанчын ацэньвацца ў суму, што перавышае 2,4 мільярды рублёў (г. зн. болей за 1 мільён 125 тысяч $). Аднак, гэта прыблізныя разлікі, зробленыя Асацыяцыяй маладых хрысціянскіх жанчын (YWCA Belarus) у межах адмысловага даследавання.

Як сцвярджаюць прадстаўніцы гэтай грамадскай арганізацыі, рэальная карціна гвалту больш складаная, і шмат кім з жанчын нават не ўсведамляецца. Бо часам ён мае настолькі тонкі характар, што яго надзвычай цяжка распазнаць. Напрыклад, псіхалагічны ціск – запалохванне ці пастаянная знявага. Або такое: муж, паабяцаўшы жонцы купіць туфлі за 50 долараў, выдае ёй роўна 35...

Шматлікія жанчыны не звяртаюцца за дапамогай у медыцынскія ўстановы, сацыяльныя службы, органы ўнутраных спраў ці судовыя інстанцыі, баючыся агалоскі. Яны перажываюць сямейныя бязладзіцы сам-насам з сабой. Такое стаўленне вядзе да назапашвання псіхалагічных траўмаў. Вынікам могуць быць псіхасаматычныя захворванні, спробы суіцыдаў або нават смяротны зыход.