Пасада псіхолага ўведзена ў жаночых кансультацыях Свярдлоўскай вобласці (Расія). Галоўная задача новых супрацоўнікаў – адважваць ад аборту.

Цяпер у Свярдлоўскай вобласці на кожнае народжанае дзіця прыпадае 1,1 аборта. Медыкі ставяць на мэце давесці суадносіны хаця б да ўзроўню 1 да 1, а праз год – 1 на 0,5. За гэтымі лічбамі стаяць сотні чалавечых жыццяў. Галоўны ўрач Свярдлоўскага абласнога цэнтра планавання і рэпрадукцыі сям’і Алена Нікалаева паведаміла журналістам: “Часцей за ўсё аборты робяць жанчыны 25 – 30-гадовага ўзросту. Многія маюць сумневы адносна свайго рашэння спыніць жыццё ўласнаму дзіцяці. Іх можна пераканаць радзіць”.

Як сказала медык, на першым месцы сярод прычын абортаў стаіць малы даход самой патэнцыяльнай маці. Далей называюцца побытавыя праблемы: адсутнасць жылля ці месца ў дзіцячым садку.
І тут напрошваецца сумны вывад: жанчыны недастаткова давяраюць сваім партнёрам, каб спакойна радзіць ад іх і не баяцца галечы, якую  можна пераадолець дзякуючы клопату аб дастатку з боку бацькі.