7 лістапада ў буйной стакгольмскай газеце “Свенска дагбладэт”  апублікаваны артыкул шведскай міністаркі па пытаннях па пытаннях інтэграцыі і гендэрнага раўнапраўя Ніамкі Сабуні. У матэрыяле яна прапаноўвае прыняць заканадаўчыя навацыі на карысць жанчын.

У прыватнасці, міністарка патрабуе не дазваляць шлюбы па дамоўленасці бацькоў. Яна таксама лічыць патрэбным скасаваць спецыяльныя дазволы на жаніцьбу (выхад замуж) для моладзі, якая яшчэ не дасягнула васемнаццацігадовага ўзросту.

Ніамка Сабуні прапануе забараніць медустановам выпісваць даведкі аб цнатлівасці і рабіць маладым дзяўчынам аперацыі па ўзнаўленні дзявоцкай плявы. Міністарка лічыць, што падобнае медыцынскае ўмяшальніцтва толькі дапамагае захоўваць гэтак званую “культуру гонару”, якая распаўсюджаная сярод прадстаўнікоў некаторых нацыянальных меншасцей, і з’яўляецца адным са спосабаў ціску на жанчын, што належаць да гэтых этнасаў.
Ніамка Сабуні прадстаўляе ў кааліцыйным буржуазным урадзе Швецыі Ліберальную народную партыю.