Аўстралійскія навукоўцы правялі даследаванне, у якім вызначалі “Спіс шчасця”. У ягоных межах вучоныя апыталі больш за 8,5 тысяч дарослых ва ўзросце ад 18 да 64 гадоў. Усё зводзілася да пошуку адказаў на пытанне: што нас робіць шчаслівымі, калі мы адчуваем эмоцыі, якія называюцца шчасцем, што нам дае гэтае пачуццё?
Большасць удзельнікаў апытання паведамілі, што найбольшую прыемнасць ім дае адпачынак і рэляксацыя, а фізічныя практыкаванні ў рэйтынгу “шчаслівых заняткаў” апынуліся на самым апошнім месцы. Такім чынам, даследчыкі прыйшлі да высновы, што аўстралійцаў найбольш радуе не матэрыяльны дабрабыт, не дасягненне нейкіх значных асабістых ці агульнанацыянальных поспехаў, а забавы ды кантакт з іншымі людзьмі.
Як мужчыны, гэтак і жанчыны – 63% усіх рэспандэнтаў – сказалі, што іх найчасцей можа ашчаслівіць адпачынак і рэляксацыя. І на гэтым падабенства абодвух палоў заканчваюцца.

Больш, чым палове мужчынаў і толькі 39 адсоткам жанчын шчасце дае гойсанне па Сеціве ды магчымасць пагуляць on-line у Інтэрнет-гульні.

55% жанчынаў зазначылі, што любяць смачна паесці і праводзіць час са сваімі блізкімі. Сярод прадстаўнікоў г. зв. “моцнага полу” дадзеныя заняткі прыносяць задавальненне толькі 45% рэспандэнтаў. Жанчынам значна больш, чым мужчынам, падабаецца гуляць з хатнімі звяркамі, чытаць добрыя кніжкі альбо купляць падарункі.
Інтымная блізкасць часцей ашчасліўлівае 48% мужчынаў (сярод жанчын такі адказ далі 40%). Палепшыць настрой дзякуючы чарачцы ў сяброўскай кампаніі не супраць 38% мужчынаў і крыху больш за чвэрць апытаных жанчынаў (28%).

Даследчыкі звяртаюць увагу на той факт, што вынікі дадзенага апытання развейваюць некаторыя стэрэатыпы, напрыклад, той, што жанчынаў хлебам не кармі, а дай пахадзіць па крамах. Згодна з атрыманымі данымі, пакупкі прыносяць радасць толькі 30 адсоткам прадстаўніц г. зв. “прыгожага полу”.