18 – 23 ліпеня ў Вене (Аўстрыя) праходзіла XVIII Міжнародная канферэнцыя па СНІД. Гэты форум адбываўся пад лозунгам "Правы чалавека: тут і зараз” і разглядаў розныя аспекты праблемы.
У прыватнасці, удзельнікі канферэнцыі актыўна абмяркоўвалі, як прыцягнуць ВІЧ-інфіцыраваных жанчын да прыняцця рашэнняў, што закранаюць іх будучыню. Гэтае пытанне на парадак дня паставілі Фонд ААН для развіцця ў інтарэсах жанчын (UNIFEM) і аб’яднанне жанчын, якія жывуць з ВІЧ.
Па выніках канферэнцыі была прынята Венская дэкларацыя. У ёй гучыць заклік да больш рацыянальнай і навукова абгрунтаванай палітыкі ў галіне наркотыкаў і ўзмацнення прафілактыкі ВІЧ сярод наркаспажыўцоў.
Сярод найважнейшых падпісантаў Венскай дэкларацыі была афіцыйная грузінская дэлегацыя (на верхнім левым здымку пасля тэксту), у складзе: Сандры Рулафс, першай ледзі краіны, Іраклія Гіаргабіяні, намесніка міністра працы, аховы здароўя і сацыяльнай абароны, ды Георгія Цэрэтэлі, віцэ-спікера нацыянальнага парламента. Жонка Міхаіла Саакашвілі адзначыла, што "Грузія падтрымлівае навукова абгрунтаваную палітыку па абароне здароўя і бяспекі грамадства”.

Міжнародныя канферэнцыі па праблематыцы ВІЧ/СНІД ладзяцца раз на два гады. На іх сустракаюцца даследчыкі, выканаўцы і лідэры праграм, якія накіраваны на пераадоленне эпідэміі.
У сёлетнім мерапрыемстве ўзялі ўдзел звыш 19 тысяч чалавек, у тым ліку 14345 дэлегатаў з усяго свету.