Рускае праваслаўе стрымана ставіцца да далейшага актыўнага супрацоўніцтва з Евангельскаю Царквою Нямеччыны. Гэта выклікана абраннем кіраўнічкай гэтае канфесіі Маргот Кёсман (на здымку). Напрыканцы кастрычніка гэтая 51-гадовая гановерка, маці чатырох дачок, разведзеная, стала на чале рады найбуйнешай пратэстанцкай супольнасці Германіі.
Арцыбіскуп Валакаламскі Іларыён (Алфеяў), старшыня Аддзялення знешніх царкоўных сувязяў Маскоўскага Патрыярхата (на фота), выклаў пазіцыю РПЦ у лісце да Евангельскай Царквы Нямеччыны. У пісьме іерарх адзначыў, што нягледзячы на тое, што раней рускае праваслаўе не прызнавала існавання святарства ў пратэстанцкіх супольнасцях, не лічыла іх царквамі ў праваслаўным разуменні, яно вяло дыялог з некаторымі з іх. Ён адбываўся ў фармаце "царква – царква”. "Аднак цяпер сітуацыя змянілася, і жанчына стала кіраўніком Евангелічнай Царквы ў Германіі. А гэта ўжо ставіць прынцыповае пытанне аб магчымасці працягу дыялогу ў згаданым фармаце,” – напісаў Іларыён.

 

"Нягледзячы на пяцьдзесят гадоў дыялогу з Праваслаўем, іншы бок ідзе ў напрамку, які драматычна паглыбляе асноўныя розніцы паміж нашымі традыцыямі,” – гаворыцца ў лісце арцыбіскупа. Іларыён дадаў: "Мы не можам да таго ж не ўлічваць меркаванне нашых вернікаў, а для іх сустрэчы і гутаркі з царквой, кіраўніком якой абрана жанчына, з’яўляюцца абсалютна непрымальнымі”. Іерарх выказаў надзею, што адносіны з нямецкімі пратэстантамі не будуць поўнасцю сарваныя, а набудуць іншы характар.