Швецыя адмаўляецца ад балаў за пол пры прыёме студэнтаў на навучанне. Гэтая сістэма павінна была зраўнаць шанцы мужчын і жанчын у мясцовых ВНУ. "Але ідэя аказалася безвыніковай, паглынула мільёны крон, а нават адказвае за дыскрымінацыю тысяч чалавек – пераважна жанчын”, – заявілі ўлады краіны. Выявілася, што студэнты, якіх не прынялі з-за полу, пісалі скаргі на навучальныя ўстановы і выйгравалі працэсы.
Нядаўна апеляцыйны суд у Лундзе (лен Сконе, Швецыя) пастанавіў, што мясцовы універсітэт незаконна выкарыстаў балы, прызначаныя для мужчын. Нягледзячы на тое, што ў некалькіх дзесяткаў жанчын ў дыпломе былі лепшыя адзнакі, кіраўніцтва гэтай буйной ВНУ прыняло на вучобу мужчын. 44 жанчыны падалі ў суд на Лундскі універсітэт. Усе яны выйгралі працэс і кожная атрымала па 35 тысяч крон (прыкладна 14 мільёнаў рублёў).
Паводле інфармацыі шведскага Цэнтра на карысць справядлівасці, ахвярамі дыскрымінацыі сталі 13 тысяч чалавек.
Падпісваючы дакумент аб скасаванні балаў за пол, міністр вышэйшай адукацыі Швецыі Тобіяс Кранцт заявіў, што задача адукацыйнай сістэмы – адчыняць, а не зачыняць дзверы перад маладымі жанчынамі.