Томас Беаці са штата Арэгон з’яўляецца адзіным у свеце мужчынам, які здолеў зацяжарыць. Амерыканец пайшоў на гэта таму, што ягоная жонка Нэнсі пасля выдалення маткі не мае магчымасці мець дзяцей.
Тома Беаці нарадзіўся дзяўчынкай, і ў юнацтве нават перамагаў на конкурсах прыгажосці. Потым ён зрабіў аперацыю па змене полу, атрымаў дакументы, якія сцвярджаюць, што ён з’яўляецца мужчынам, і ажаніўся. Зацяжарыць Томас змог таму, што, змяняючыся ў мужчыну, рашыўся толькі на выдаленне грудзей ды гарманальную тэрапію, але аперацыю па змене палавых органаў не зрабіў. Мужчына зацяжарыў пасля другой спробы штучнага апладнення.
Журналістам Томас расказаў, што сутыкнуўся з жорсткай дыскрымінацыяй з боку медыцынскіх работнікаў. Яму даводзіцца зносіць кпіны і відавочныя здзекі. Ад сям'і Беаці адвярнуліся многія сябры і знаёмыя, а таксама родзічы жонкі, якія не ведалі, што Томас – транссексуал. Тым не менш Томас рыхтуецца нарадзіць у пачатку ліпеня. Ультрагукавое даследаванне паказала, што у мужчыны з’явіцца дачка.
Томас сцвярджае, што ён адчувае сябе сурагатнай маці свайго дзіця і ў той жа час ідэнтыфікуе сябе як мужчыну. Пасля нараджэння малой сям’я Беаці збіраецца прадаць права на публікацыю сваёй гісторыі якому-небудзь СМІ.