Міністэрства прамысловасці Швецыі паведаміла, што значна вырас працэнт прадстаўніц жаночага полу, якія ўзначальваюць праўленні дзяржаўных прадпрыемстваў каралеўства.            
Калі ў 2006 годзе толькі 22 адсоткі старшыняў гэтых фірм былі жанчынамі, то сёлета – ужо 35%. Сярод чальцоў кіраўнічых органаў згаданых прадпрыемстваў гендэрны баланс амаль поўнасцю вытрымліваецца. У праўленнях гэтых фірм налічваецца 48 адсоткаў жанчын.                   

Гётэборгскі гарадскі мастацкі музей (губерня Вэстэротланд, Швецыя) зладзіў выставу работ беларускага фатографа Андрэя Лянкевіча (на здымку). Экспазіцыя называецца “У яго жаночае імя”. На фота прадстаўлена штодзённае жыццё беларускай сям’і, якая складаецца з дзвюх жанчын і маленькай дачкі адной з іх.
Зразумела, што гэты саюз з’яўляецца вялікім выключэннем. Пераважная большасць геяў і лесбіянак у Беларусі вымушаны хаваць сваю сексуальную арыентацыю і весці падвойнае жыццё.