Паводле дадзеных, якія агучыла на "круглым стале” "Жаночая канвенцыя ў Беларусі” дырэктарка асветніцкай установы "Цэнтр прававой інфармацыі” Вольга Смалянка, на 1 ліпеня гэтага года ў Беларусі налічвалася ўсяго толькі 32 жаночыя арганізацыі (ва ўсялякім выпадку, у статуце гэтых НДА пазначана, што яны займаюцца жаночымі пытаннямі). На сёлетняга 1 кастрычніка ў краіне ўвогуле было зарэгістравана 2224 грамадскія аб’яднанні.
Пяць гадоў таму ў РБ было 2214 недзяржаўных арганізацый. І з іх 38 – жаночых.
Між іншым, паводле вынікаў даследаванняў лабараторыі "Новак”, большасць жаночых асацыяцый у першай тройцы праблем, якія непакояць іх на сённяшні дзень, назвала недастатковае фінансаванне, недасканалае заканадаўства, а таксама нізкую сацыяльную актыўнасць грамадзян.
"Сумная выснова вынікае з гэтай статыстыкі, – зрабіла вывад сп-ня Смалянка. – Ніякай дынамікі росту не заўважаецца. Наадварот, колькасць жаночых арганізацый скарацілася. І гэта пры тым, што Міністэрства юстыцыі сцвярджае, што ў Беларусі без асаблівых праблем рэгіструюцца самыя розныя арганізацыі”.