Бадай усе мы ведаем анекдот пра тое, што на свеце няма непрыгожых жанчынаў, бывае толькі замала алкаголю. І сапраўды, пасля спажывання нават невялікай дозы напою з градусамі, чалавек пачынае глядзець на свет “праз ружовыя акуляры”. Яшчэ ў 1993 годзе брытанцамі былі праведзеныя даследаванні, падчас якіx студэнтам на падпітку ў пабах паказвалі здымкі жанчынаў. Мужчынская талерантнасць моцна павышалася. Але даследчыкі прыйшлі да высновы, што гэта неабавязкова ўплыў алкаголю, бо бывальцы пабаў і рэстаранаў – гэта спецыфічны тып чалавека, адкрытага на новыя знаёмствы, якія прыхільна ставіцца да ўсіх навокал. 
З іншых даследаванняў, гэтым разам – амерыканскіх, вядома, што разам з алкаголем нам б’е ў галаву зухаватасць. Тады чалавек гатовы апынуцца ў сітуацыі, да якой у нармальным стане ён бы не дапусціў. Гэта датычыць, напрыклад, рызыкоўных сексуальных кантактаў.
І вось надоечы навукоўцы з Брыстальскага універсітэта (горад-графства Брысталь, Англія, Аб’яднанае каралеўства) правялі новыя даследаванні. 84 студэнтам прынеслі напоі. Палова з іх была з алкаголем, а другая – хоць падобная па смаку – без. Колькасць спіртнога падбіралася індывідуальна паводле вагі. Праз 15 хвілін пасля таго, як студэнты апаражнілі свае шклянкі, ім паказалі здымкі і жанчынаў, і мужчынаў. Вынікі былі нечаканыя. Хоць ранейшыя даследаванні паказалі, што з-за алкаголю людзі становяцца лагоднымі ў ацэнках і больш схільнымі назваць кагосьці прыгожым, то вынікі апошняга даследавання даказалі, што гэта адносіцца таксама да прадстаўнікоў свайго ж полу. Іншымі словамі, пасля спажывання спіртнога мужчынскім вачам падабаюцца не толькі жанчыны, але і мужчыны. Гэтак жа пасля алкаголю глядзяць на абодва полы і жанчыны. Цяпер навукоўцы з Брысталя будуць аналізаваць, як у чалавека на падпітку мяняецца дадзеная ацэнка ў залежнасці ад дозы спажытага алкаголю.