Журналістка Разана аль-Ямі прысуджаная да 60 удараў бізуном за дачыненне да тэлевізійнай праграмы, падчас якой мужчына распавёў аб сваім сексуальным вопыце.
Як паведаміла Ямі, суддзя ў Джыдзе (правінцыя Мека, Саудаўская Аравія) зняў з яе абвінавачванні ў непасрэдным удзеле ў тэлешоў на ліванскім спадарожнікавым канале LBC (Lebanese Broadcasting Corporation). Аднак, як гаворыцца ў пастанове, ТВ дзейнічала ў Саудаўскай Аравіі без адпаведнай ліцэнзіі. У сувязі з гэтым улады зачынілі яго офісы і арыштавалі ўдзельнікаў праграмы. Журналістка не мае намеру абскарджваць прысуд.
Напачатку кастрычніка разведзены 32-гадовы жыхар Джыды Мазель Абдул Джавад атрымаў пяць гадоў турмы і тысячу удараў бізуном за расповед у эфіры пра тое, як ён знаёміцца з жанчынамі на вуліцы. Шчырасць Джавада была кваліфікаваныя судом як “прапаганда распусты”. Тром астатнім удзельнікам тэлешоў на LBC суд прызначыў пакаранне ў выглядзе двух гадоў турмы і 300 удараў бізуном.