У нашай краіне плануецца пачаць вытворчасць уласных лічбавых мамографаў, паведаміў на прэс-канферэнцыі кіраўнік аддзела анкамамалогіі Рэспубліканскага навукова-практычнага цэнтра анкалогіі і медыцынскай радыялогіі імя М. М. Аляксандрава Леанід Путырскі.
Паводле слоў спецыяліста, адна са сталічных фірм рыхтуецца выпускаць лічбавыя мамографы. Як чакаецца, іх кошт будзе ў два разы меншы за імпартныя аналагі.
“Аднак гэта не азначае, што ў хуткім будучым у нашай краіне будзе ўкаранёны ўсеагульны мамаграфічны скрынінг”, – заўважыў Леанід Путырскі. Паводле даных Сусветнай арганізацыі аховы здароўя, гэты метад прымальны для багатых краін. “Мы павінны былі б зрабіць мамаграфічны скрынінг, але пакуль грошай на ўсё не хапае”, – канстатаваў спецыяліст. Хоць Міністэрства аховы здароўя штогод закупляе для медыцынскіх устаноў Беларусі новыя мамографы, у прыватнасці, у РНПЦ анкалогіі і медрадыялогіі ўстаноўлены апарат – адзін з лепшых у Еўропе. Але каб наладзіць усеагульны скрынінг, патрэбна каля 50 стацыянарных і мабільных мамографаў плюс каля 200 вопытных рэнтгенолагаў, якія спецыялізуюцца на расшыфроўцы менавіта здымкаў малочнай залозы. Такіх спецыялістаў трэба рыхтаваць гадамі.
Адзіная перавага метаду мамаграфічнага скрынінгу ў тым, што ён дае магчымасць выявіць нулявую стадыю раку, гэта значыць калі пухліна не перавышае 0,5 см. У астатніх выпадках знайсці пухліну можна і з дапамогай правільнага самаабследавання або клінічнага агляду ва ўрача.
“Мамаграфічны скрынінг будзе ўкараняцца ў Беларусі, але паступова, на працягу як мінімум некалькіх гадоў”, – рэзюмаваў Леанід Путырскі.