Упершыню ў Беларусі ладзіцца маніторынг дыскрымінацыі лесбіянак, геяў, бісексуалістаў і трансгендэраў (ЛГБТ). Гэта – першае ў нашай краіне комплекснае даследаванне прававога становішча секс-меншасцяў. Яго ажыццяўляе праваабарончы праект "ГейБеларусь” пры ўдзеле Беларускай ініцыятывы за сексуальнае і гендэрнае раўнапраўе. Даследаванне мае на мэце праінфармаваць грамадскасць пра рэальную практыку парушэнняў правоў геяў, лесбіянак, бі- і транссексуалістаў.
У межах маніторынгу эксперты ацэняць адпаведнасць беларускай нарматыўнай базы міжнародным стандартам. Будуць прааналізаваныя мас-медыя на прадмет наяўнасці дыскрымінацыйных заклікаў і дэзінфармацыі адносна ЛГБТ. Цягам бліжэйшых месяцаў будуць сабраныя звесткі пра парушэнні правоў секс-меншасцяў, здзейсненыя ў 2007 – 2009 гадах.
У выніку даследавання будуць выпрацаваныя рэкамендацыі па пераадоленні гамафобіі і паляпшэнні ажыццяўлення правоў і свабод грамадзян незалежна ад іх сексуальнай арыентацыі і гендэрнай ідэнтычнасці.
Чакаецца, што ў сакавіку 2010 года рэзультаты маніторынгу будуць апублікаваныя на беларускай мове. Напрыканцы вясны яны з’явяцца ў выглядзе ангельскамоўнай брашуры. Электроннае выданне таксама будзе даступнае і ў рускай версіі.