Прэзідэнт ЗША Барак Абама абвясціў студзень 2010 года перыядам барацьбы з рабствам і гандлем людзьмі. Кульмінацыяй месячніка стане штогадовае святкаванне Нацыянальнага дня свабоды 1 лютага.
Прэзідэнт Абама называе гандаль людзьмі "сучасным нявольніцтвам” і "зневажаннем нашай агульнай чалавечай годнасці”. "Мільёны людзей ва ўсім свеце вымушаныя займацца прымусовай працай, у тым ліку тысячы – на тэрыторыі Злучаных Штатаў, – гаворыцца ў дэкларацыі Белага дома. – Адзначаючы Нацыянальны месяц барацьбы з рабствам і гандлем людзьмі, мы прызнаем, што ў сучасную эпоху ўсё яшчэ існуюць некаторыя віды нявольніцтва, і мы зноў абавязваемся спыніць гандляроў людзьмі, якія займаюцца гэтым жахлівым бізнесам”.
Раней дзяржаўны сакратар Хілары Клінтан заявіла, што адміністрацыя Абамы лічыць барацьбу з гандлем людзьмі ў сваёй краіне і за мяжой найважнейшым напрамкам амерыканскай знешняй палітыкі. "Мы цвёрда настроены на супрацоўніцтва з усімі дзяржавамі”, – заявіла дзяржсакратар. Для вырашэння праблемы ўрад ЗША фінансуе 140 праграм па барацьбе з гандлем людзьмі амаль у 70 краінах, а таксама 42 ўнутраныя аператыўныя групы, якія супрацьдзейнічаюць гэтай пагрозе на тэрыторыі Злучаных Штатаў.