Большасць жанчын, якія адбываюць тэрміны турэмнага зняволення ў Дамініканскай Рэспубліцы, былі пакараныя за трафік наркотыкаў і злоўжыванне імі. Гэта вынікае са статыстыкі, апублікаванай Галоўным упраўленнем турмаў гэтай лацінаамерыканскай краіны.
Актыўны ўдзел жанчын у гандлі забароненымі рэчывамі тлумачыцца эканамічнай сітуацыяй, беспрацоўем і пагаршэннем матэрыяльнага становішча, што прыводзіць да спакусы зарабіць лёгкія грошы.
Другое злачынства, што часта сустракаецца, – забойства. За яго асуджаныя 21% жанчын, што знаходзяцца ў турмах.
Варта адзначыць, што дамініканскія жанчыны часта становяцца ахвярамі згвалтаванняў, і найбольш сур’ёзным наступствам гэтага з’яўляецца непажаданая цяжарнасць, ад якой паводле закону нельга пазбавіцца.
Аборты ў Дамініканскай Рэспубліцы не дазваляюцца з 1948 года. Паводле крымінальнага кодэксу краіны, жанчыне, якая зрабіла штучнае перарыванне цяжарнасці, пагражае ад 2 да 5 гадоў турэмнага зняволення. Калі аборт зроблены з дапамогай медыкаў, то лекара могуць пасадзіць на тэрмін ад 5 да 20 гадоў.
Згодна з леташнім апытаннем, 80% насельніцтва астраўной дзяржавы выступаюць за дазвол на перарыванне цяжарнасці па медыцынскіх паказаннях.