Нацыянальны статыстычны камітэт Беларусі паведаміў, што ў краіне ў апошнія гады павялічваецца сярэдні ўзрост жанчыны пры ўступленні ў шлюб. Як адзначыў начальнік кіравання па працы з карыстальнікамі статыстычнай інфармацыі Белстата Віктар Міхно, такая тэндэнцыя характэрна для шматлікіх еўрапейскіх дзяржаў.
Маладыя людзі не спяшаюцца злучаць сябе шлюбнай сувяззю. "Так, у 2009 годзе сярэдні ўзрост беларускіх нявест склаў 24,2 гады (у 2008 – 23,9 гады, у 2007 – 23,8, а ў 2000 – 22,8 гады)”, – распавёў прадстаўнік статыстычнага ведамства.
На думку спецыялістаў, павелічэнне сярэдняга ўзросту ўступлення ў шлюб звязана з тым, што будучыя маладыя перад вяселлем імкнуцца як мага лепш уладкаваць будучае сямейнае жыццё: атрымаць адукацыю і прайсці прафесійную падрыхтоўку, часта сумяшчаючы яе з працоўнай дзейнасцю.
Па дадзеных Белстата, павялічыўся і сярэдні ўзрост маці пры з’яўленні на свет яе першынца. Цяпер ён складае 24,6 гады (25 гадоў – у гараджанак і 23,1 – на вёсцы). Яшчэ ў 2000 годзе гараджанкі нараджалі ў першы раз у 23,6 гады, а жыхаркі сельскай мясцовасці – у 22,2 гады (у сярэднім па краіне – у 23,3 гады).