У дакладзе Міжнароднага бюро працы (МБП), які мае назву "Жанчыны на рынку працы: дасягненні і праблемы”, адзначаецца, што гендэрныя забабоны глыбока ўкараніліся ў грамадстве і на рынку працы.
Даклад МБП сведчыць: з 1980 па 2008 год эканамічная актыўнасць жанчын на рынку працы ўзрасла з 50,2 да 51,7 працэнта, а актыўнасць мужчын крыху знізілася – з 82 да 77,7 працэнта. У выніку гендэрны разрыў па гэтым паказчыку скараціўся з 32 да 26 працэнтных пунктаў.
Рост актыўнасці жанчын на рынку працы адзначаны ў большасці рэгіёнаў планеты.
Пры гэтым узрасла доля жанчын сярод наёмных работнікаў – з 42,8 працэнта ў 1999 годзе да 47,3% летась, а іх доля сярод работнікаў з нестабільнай занятасцю за той жа перыяд знізілася з 55,9% да 51,2 працэнта.

Сара Элдэр, супрацоўніца аддзела тэндэнцый занятасці Міжнароднай арганізацыі працы і кіраўнічка аўтарскай групы дакладу МБП, заявіла: "Мы па-ранейшаму бачым, што жанчыны часцей, чым мужчыны, вымушаны згаджацца на нізкааплатную і небяспечную працу. Прычына заключаецца ў тым, што ў іх няма іншых магчымасцяў занятасці альбо ў тым, што такая работа дазваляе ім спалучаць працу і сямейныя абавязкі. Мужчыны з падобнымі цяжкасцямі не сутыкаюцца”.
Элдэр лічыць, што "неабходна дабівацца больш дынамічных гендэрных паляпшэнняў у сферы працы і заняткаў, і гэтая задача можа быць ажыццёўлена”.
Глабальны эканамічны крызіс спачатку закрануў сектары эканомікі, дзе пераважаюць мужчыны (фінансы, вытворчасць і будаўніцтва), аднак затым крызіс распаўсюдзіўся і на іншыя галіны, дзе працуюць у асноўным жанчыны, у тым ліку на сферу паслуг.

Паводле ацэнак МАП, беспрацоўе сярод жанчын у свеце ўзрасло з 6 працэнтаў у 2007 годзе да леташніх 7%. Гэта крыху больш, чым такі ж паказчык сярод мужчын: з 5,5 да 6,3 адсотка.