Палова прастытутак, якія працуюць у калумбійскай сталіцы Санта-фе-дэ-Багаце, закахана ў сваіх сталых кліентаў, якія, у большасці выпадкаў, з’яўляюцца жанатымі мужчынамі. Гэта вынікае з апытання, праведзенага гарадскім міністэрствам грамадскай інтэграцыі (СІС), супрацоўнікі якога аказваюць сацыяльную падтрымку мясцовым "жрыцам кахання”. Даследаванне ахапіла ўсіх зарэгістраваных прастытутак Багаты – 4,3 тысячы чалавек.
У міністэрстве адзначаюць, што ў сацыялагічным даследаванні таксама прынялі ўдзел 350 мужчын, якія з’яўляюцца пастаяннымі кліентамі тутэйшых публічных дамоў. Па дадзеных СІС, кожны пяты з рэспандэнтаў адказвае сваёй "каханцы” ўзаемнасцю.
Паводле інфармацыі ведамства, усяго ў калумбійскай сталіцы працуюць больш за 450 публічных дамоў. Пры гэтым чыноўнікі адзначаюць, што гэта толькі "надводная частка айсберга”. Для параўнання, па дадзеных даследавання, праведзенага ў 1991 годзе адной з мясцовых няўрадавых арганізацый, у Багаце налічвалася амаль 1100 публічных дамоў. У гэтых установах працавалі 14200 прадстаўніц секс-бізнесу.
У СІС адзначаюць, што большую частку наведвальнікаў публічных дамоў Багаты складаюць вайскоўцы і работнікі іншых сілавых структур, а таксама вадзіцелі грузавікоў і грамадскага транспарту.
Акрамя гэтага, ведамства ўстанавіла, што больш за палову багоцкіх прастытутак прыехалі ў сталіцу на заробкі з іншых дэпартаментаў Калумбіі.