У многіх краінах у апошні час зроблена многа дзеля аховы годнасці жанчын, але трэба здзейсніць яшчэ больш, бо ва ўсім свеце кабеты і надалей з’яўляюцца ахвярамі гвалту. На гэта звярнула ўвагу дэлегацыя Ватыкана на форуме Аб’яднаных Нацый, калі дыскутавалася пытанне пра становішча жаночага полу. Афіцыйную заяву на гэты конт надоечы агучыла Кэці Мерфі, дарадчыца пастаяннага назіральніка Святога Пасада пры ААН.
Паводле дакумента, Ватыкан выказвае надзею, што нядаўна створаная структура "ААН – жанчыны” будзе здольная дапамагчы кабетам, асабліва мацяркам.
Прадстаўніца ватыканскай дэлегацыі падкрэсліла неабходнасць прадухілення гвалту і патрэбу ў клопаце аб яго ахвярах. Асаблівай дапамогі патрабуюць эмігранткі, а таксама прадстаўніцы этнічных і рэлігійных меншасцяў. Вялікай праблемай з’яўляецца гандаль людзьмі, якому спрыяе галеча, беспрацоўе і адсутнасць доступу да адукацыі. Гэтай трагедыі трэба супрадзейнічаць не толькі там, адкуль паходзяць ахвяры, але і ў краінах, куды гэтыя жанчыны трапляюць.
Дэлегацыя Ватыкана заклікае да ўзмацнення законаў супраць прастытуцыі, дзіцячай парнаграфіі і сексуальнага выкарыстання, каб больш эфектыўна абараняць жанчын і дзяцей. Чалавека ні ў якім выпадку нельга выкарыстоўваць. Неабходна забяспечыць ахову здароўя жанчын, асабліва цяжарных і з малымі дзецьмі. "Залежнасць эканамічнай дапамогі для краін, якія знаходзяцца на шляху да развіцця, ад прыняцця метадаў планавання сям’і не служыць здароўю і дабрабыту жанчын”, – сказала Мерфі. Яна падкрэсліла, што сапраўднае "развіццё жанчын уключае павагу іх годнасці, у тым ліку іх этнічнай і рэлігійнай ідэнтычнасці”.