"Дзеці-жаўнеры маюць права чакаць ад міжнароднай супольнасці абароны і заканчэння раз і назаўсёды гэтай ганебнай практыкі”, – сказаў на форуме Аб’яднаных Нацый прадстаўнік Ватыкана. Арцыбіскуп Франсіс Чулікат выступіў на Генеральнай Асамблеі падчас дэбатаў, на якіх дыскутаваліся пытанні абароны правоў дзяцей.
Ватыканскі дыпламат папярэдзіў, што ў рэгіёнах, закранутых войнамі, расце беспакаранасць і паблажлівасць для вінаватых, якія выкарыстоўваюць непаўналетніх ва ўзброеных канфліктах. Колькасць дзяцей-салдатаў ацэньваецца сёння ў чвэрць мільёна. "Міжнародная супольнасць з’яўляецца іх маральным даўжніком”, – заявіў пастаянны назіральнік апостальскай сталіцы пры ААН.

 

З такім выкарыстоўваннем дзяцей можна эфектыўна змагацца. Адносна гэтага існуе адпаведны прававы дакумент – факультатыўны пратакол да Канвенцыі аб правах дзіцяці. Ён тычыцца менавіта абароны дзяцей ад іх выкарыстання ва ўзброеных канфліктах і тэрарызме, а таксама ад нявольніцтва, прастытуцыі і парнаграфіі. Хоць сёлета адзначаецца дзесяцігоддзе існавання пратакола, ёсць краіны, якія яго яшчэ не падпісалі.